غنوا معانا

امبارح جبت قماش عشان اعمل عباية اروح اصلي بيها
عندي عبايات كتير بس مش بحبهم
مش بيقولوا انا مين
وانا لازم البس حاجة احس اني مبسوطة فيها
مش منظرة
بس راحة
بفكر كمان اروح بيها المستشفي
و ده مش انا خالص لاني بحب البس قووووي
بس مش عايزة اضيع وقت ولا حسنات في التفكير في اللبس في رمضان
رمضان
اول مرة احس بيه قبل ما يجي كده
رمضان
اول مرة
استعد له من بدري كده
وان شاء الله
لو بلغته
يكون احسن رمضان عدي عليا

حبة ابداع..حبة تهييس..سميها زي ماتسميها..

قصيت شعري
وانا اعشق الشعر القصير
مريح
لذيذ
مابيعوزش شاميو كتير
ولو حبيت اعمل فير بيتعمل في ثانية
ماقلقش انه ممكن يبان من تحت الطرحة..استحالة طبعا..
بيخليني شكلي صغير
شكلي زي الكتكوت الظريف اللي لسه واخد دش
في الحر مش بيضايقني
قفايا علي طول معرض للهواء الطلق
حد يفهمني بقي او يقنعني ان الشعر القصير مش حلو؟؟
طب ازااااي؟؟




عندي برد
وغالبا بتكون ايام غريبة قوي ايام البرد ديه..
انا بكون غريبة
بحس اني ماشية علي سفنج او سحاب
لا لا
ماشية علي مارشمالو
بحبه قوي
بس مش بفكر اجيبه كتير

العرض الرئيسي للبرد عندي غالبا بيكون النوم
والنوم بيكون هو العلاج الرئيسي لحالتي برده
بس الغريب اني في الاوقات اللي مابنامش فيها
بهد حيل اهلي
مرة امسك الدولاب انضفه
مرة امسك البيت انضفه
وانا اصلا محبش انضف
مرة اغسل هدومي
منتهي الغباء
وفي الايام اللي بكون زي القردة فيها
بكون اكسل من الخرتيت